Ganesh Chaturthi 2024:(ಸೆ.7) ಇಡೀ ನಮ್ಮ ಭಾರತದಾದ್ಯಂತ ಗಣೇಶ ಹಬ್ಬವನ್ನು ಅತ್ಯಂತ ಸಂಭ್ರಮ ಹಾಗೂ ಸಡಗರದಿಂದ ಎಲ್ಲರೂ ಆಚರಿಸುತ್ತಾರೆ. ಗಣಪ ಅಂದ್ರೆ ಎಲ್ಲರಿಗೂ ಅಚ್ಚುಮೆಚ್ಚು. ತಮ್ಮ ಇಷ್ಟಾರ್ಥಗಳನ್ನು ಸಿದ್ಧಿಸುವ ಸಿದ್ಧಿವಿನಾಯಕ. ವಿಘ್ನಗಳನ್ನು ನಿವಾರಿಸುವ ವಿನಾಯಕ. ಗಣೇಶ ಹಬ್ಬ ಬಂದ್ರೆ ಸಾಕು ಎಲ್ಲರ ಮನೆಯಲ್ಲೂ ಗಣಪನನ್ನು ಕೂರಿಸುವುದು ವಿಶೇಷ.
ಮನೆಯಲ್ಲಿ ಗಣೇಶ ಮೂರ್ತಿಯನ್ನು ತಂದಿಟ್ಟು, ವಿಶೇಷವಾದ ಪೂಜೆ ಪುನಸ್ಕಾರಗಳೊಂದಿಗೆ ಕೆಲವು ದಿನಗಳವರೆಗೆ ಸಾಂಪ್ರದಾಯ ವಿಧಾನಗಳಲ್ಲಿ ಭಾಗಿಯಾಗಿ ಪೂಜೆ ನೆರವೇರಿಸುತ್ತಾರೆ. ಇಂದು ಗಣೇಶ ಚತುರ್ಥಿಯ ಸಂದರ್ಭದಲ್ಲಿ ಗಣೇಶನಿಗೆ ನೈವೇದ್ಯಕ್ಕೆಂದು ಬಲುಪ್ರಿಯವಾದ ಮೋದಕವನ್ನು ತಯಾರು ಮಾಡುತ್ತಾರೆ. ವರ್ಷಕ್ಕೊಂದು ಬಾರಿ ಸವಿಯುವ ಮೋದಕ ಆರೋಗ್ಯಕ್ಕೆ ಎಷ್ಟು ಒಳ್ಳೆಯದು ಮತ್ತು ಅದರಿಂದ ಸಿಗುವ ಪ್ರಯೋಜನಗಳು ಯಾವುದೆಲ್ಲಾ ಎಂಬುದನ್ನು ತಿಳಿದುಕೊಳ್ಳೋಣ!!
ಪುರಾಣಗಳ ದೃಷ್ಟಿಯಿಂದ ನೋಡುವುದನ್ನು ಹೊರತುಪಡಿಸಿದರೆ, ಮೋದಕ ಬಹಳ ಆರೋಗ್ಯಕರ. ಏಕೆಂದರೆ ಮೃದುವಾದ ಅಕ್ಕಿ ಹಿಟ್ಟಿನ ಒಳಗೆ ತೆಂಗಿನಕಾಯಿ ಮತ್ತು ಬೀಜಗಳನ್ನು ಸೇರಿಸಿ ಸ್ಟೀಮ್ ಮೇಲೆ ಬೇಯಿಸಲಾಗುತ್ತದೆ. ಹೀಗಾಗಿ ಇದೊಂದು ಆರೋಗ್ಯಕರವಾದ ಸಾಂಪ್ರದಾಯಿಕ ಸಿಹಿ ಪದಾರ್ಥವಾಗಿದೆ. ಇದರಲ್ಲಿರುವ ಪೌಷ್ಟಿಕ ಸತ್ವಗಳು ಮತ್ತು ಮಹತ್ವಪೂರ್ಣ ಆರೋಗ್ಯ ಪ್ರಯೋಜನಗಳನ್ನು ನೀವು ತಿಳಿದುಕೊಳ್ಳಲೇಬೇಕು.
ಕೇವಲ ದೇಹಕ್ಕೆ ಹಿತವಾದ ಮತ್ತು ಆರೋಗ್ಯಕರವಾದ ಉತ್ಪನ್ನಗಳನ್ನು ಬಳಸಿಕೊಂಡು ತಯಾರು ಮಾಡುವ ಮೋದಕ ಯಾವುದೇ ಎಣ್ಣೆ ಅಥವಾ ತುಪ್ಪದಲ್ಲಿ ಫ್ರೈ ಆಗುವುದಿಲ್ಲ. ಬದಲಿಗೆ ಸ್ಟೀಮ್ ಮೇಲೆ ಬೇಯುತ್ತದೆ.
ಹಾಗಾಗಿ ಇದು ನಮ್ಮ ದೇಹಕ್ಕೆ ಬಹಳ ಆರೋಗ್ಯಕರ ಮತ್ತು ಹಗುರ. ಅಕ್ಕಿ ಹಿಟ್ಟಿನ ಕೋಟಿಂಗ್ ಇರುವುದರಿಂದ ಇದರಲ್ಲಿ ನಮಗೆ ವಿಟಮಿನ್ b1 ಹೇರಳವಾಗಿ ಸಿಗುತ್ತದೆ. ಜೊತೆಗೆ ಪ್ರೋಟಿನ್ ಮತ್ತು ಕಾರ್ಬೋಹೈಡ್ರೇಟ್ ಕೂಡ. ಮಿತ ಪ್ರಮಾಣದಲ್ಲಿ ಸೇವಿಸುವುದರಿಂದ ಇದರ ಪೂರ್ಣ ಲಾಭಗಳನ್ನು ಪಡೆದುಕೊಳ್ಳಬಹುದು.
ತುಪ್ಪದಲ್ಲಿ ಬೇಯಿಸಿದ ತೆಂಗಿನಕಾಯಿ ಹಾಗೂ ಬೆಲ್ಲ ತನ್ನದೇ ಆದ ಪ್ರಯೋಜನಗಳನ್ನು ನೀಡುತ್ತದೆ. ಇದರ ಜೊತೆಗೆ ಏಲಕ್ಕಿ ಮತ್ತು ಇನ್ನು ಕೆಲವು ಬೀಜಗಳನ್ನು ಹಾಕಿರುವುದರಿಂದ ನಮ್ಮ ಜೀರ್ಣ ಶಕ್ತಿ ಉತ್ತಮಗೊಳ್ಳುತ್ತದೆ.
ಇನ್ನು ಕೆಲವು ಜನರು ಬೇರೆ ಬೇರೆ ತರಹದ ಕಾಂಬಿನೇಷನ್ ಗಳನ್ನು ಫಿಲ್ಲಿಂಗ್ ಮಾಡುತ್ತಾರೆ. ಇದರಿಂದಲೂ ಸಹ ಮೋದಕದ ರುಚಿ ಮತ್ತು ಆರೋಗ್ಯ ಪ್ರಯೋಜನಗಳು ಹೆಚ್ಚಾಗುತ್ತವೆ.
ತೆಂಗಿನಕಾಯಿ ಮತ್ತು ಬೆಲ್ಲ ಮಿಕ್ಸ್ ಮಾಡಿ ತಯಾರು ಮಾಡಿದ ಮೋದಕ ನಮಗೆ ಬಲವಾದ ಪ್ರಯೋಜನಗಳನ್ನು ಮತ್ತು ಪೌಷ್ಟಿಕ ಸತ್ವಗಳನ್ನು ನೀಡುತ್ತದೆ. ಮೋದಕ ಸೇವನೆ ಮಾಡುವುದರಿಂದ ಸಿಗುವ ಆರೋಗ್ಯ ಪ್ರಯೋಜನಗಳನ್ನು ನೋಡುವುದಾದರೆ,
ಮಲಬದ್ಧತೆಗೆ ರಾಮಬಾಣ:
ತುಪ್ಪದಲ್ಲಿ ಬೇಯಿಸಿದರೆ ತೆಂಗಿನಕಾಯಿ ಹಾಗೂ ಬೆಲ್ಲ ಬಳಸಿ ಮೋದಕ ತಯಾರು ಮಾಡುವುದರಿಂದ ನಮ್ಮ ಹೊಟ್ಟೆಯ ಆರೋಗ್ಯದ ಮೇಲೆ ಇದು ಒಳ್ಳೆಯ ಪ್ರಭಾವ ಬೀರುತ್ತದೆ. ನಮ್ಮ ದೇಹದಿಂದ ವಿಷಕಾರಿ ಅಂಶಗಳನ್ನು ಹೊರಗೆ ಹಾಕುವುದರ ಜೊತೆಗೆ ಕರುಳಿನ ಚಲನೆ ಚೆನ್ನಾಗಿ ನಡೆಯುವಂತೆ ನೋಡಿಕೊಳ್ಳುತ್ತದೆ.
ನಾರಿನ ಪ್ರಮಾಣ ಹೆಚ್ಚಾಗಿ ಸಿಗುವುದರಿಂದ ನಮ್ಮ ಜೀರ್ಣಶಕ್ತಿ ಉತ್ತಮಗೊಳ್ಳುತ್ತದೆ. ಜೊತೆಗೆ ಆರೋಗ್ಯಕರವಾದ ಕೊಬ್ಬು, ನಾರು ಹಾಗೂ ಆಂಟಿ ಆಕ್ಸಿಡೆಂಟ್ ಗಳ ಸಹಿತ ಸಣ್ಣ ಪ್ರಮಾಣದ ಪೌಷ್ಟಿಕಾಂಶಗಳು ಕೂಡ ಸಿಗುವುದರಿಂದ ಮೋದಕ ನಮ್ಮ ಆರೋಗ್ಯಕ್ಕೆ ತುಂಬಾ ಒಳ್ಳೆಯದು ಎಂದೇ ಹೇಳಬಹುದು.
ಹೃದಯಕ್ಕೆ ತುಂಬಾ ಒಳ್ಳೆಯದು:
ಮೋದಕದಲ್ಲಿ ಬಳಕೆಯಾಗಿರುವ ತೆಂಗಿನಕಾಯಿ ಮತ್ತು ತುಪ್ಪ ನಮ್ಮ ದೇಹದಲ್ಲಿ ಒಳ್ಳೆಯ ಕೊಲೆಸ್ಟ್ರಾಲ್ ಹೆಚ್ಚಿಸುತ್ತದೆ. ಇದು ಹೃದಯದ ಆರೋಗ್ಯಕ್ಕೆ ಬಹಳ ಒಳ್ಳೆಯದು. ಕೆಟ್ಟ ಕೊಲೆಸ್ಟ್ರಾಲ್ ಪ್ರಮಾಣವನ್ನು ಕಡಿಮೆ ಮಾಡುವುದರ ಜೊತೆಗೆ ಮೆಟಬಾಲಿಸಂ ಹೆಚ್ಚಿಸುತ್ತದೆ.
ಇದು ರಕ್ತದ ಒತ್ತಡವನ್ನು ನಿರ್ವಹಣೆ ಮಾಡುವುದರ ಜೊತೆಗೆ ಬ್ಲಡ್ ಶುಗರ್ ಲೆವೆಲ್ ನಿರ್ವಹಣೆ ಮಾಡುತ್ತದೆ. ನಮ್ಮ ಹೃದಯದ ಆರೋಗ್ಯಕ್ಕೆ ತುಪ್ಪ ಅತ್ಯುತ್ತಮ ಕೊಡುಗೆ ನೀಡುತ್ತದೆ.
ಮೋದಕ ಸೇವನೆ ಮಾಡುವುದರಿಂದ ನಮಗೆ ವಿಟಮಿನ್ ಎ ಸಹಿತ ಅಗತ್ಯ ಫ್ಯಾಟಿ ಆಮ್ಲಗಳು ಸಿಗುತ್ತವೆ. ಇನ್ನೊಂದು ಕಡೆ ತೆಂಗಿನಕಾಯಿ ಮತ್ತು ಡ್ರೈ ಫ್ರೂಟ್ಸ್ ಸಸ್ಯಾಧಾರಿತ ಸ್ಟೆರಾಲ್ ಗಳನ್ನು ಹೊಂದಿರುವುದರಿಂದ ನಮ್ಮ ದೇಹದಲ್ಲಿ ಒಳ್ಳೆಯ ಕೊಲೆಸ್ಟ್ರಾಲ್ ಪ್ರಮಾಣವನ್ನು ಹೆಚ್ಚಿಸಿ ಕೆಟ್ಟ ಕೊಲೆಸ್ಟ್ರಾಲನ್ನು ಕಡಿಮೆ ಮಾಡುತ್ತದೆ.
ಮೂಳೆಗಳ ಆರೋಗ್ಯಕ್ಕೆ ಒಳ್ಳೆಯದು:
ಮೋದಕದಲ್ಲಿ ನಮಗೆ ಆರೋಗ್ಯಕರವಾದ ಕೊಬ್ಬು, ಪ್ರೋಟೀನ್ ಹಾಗೂ ವಿಟಮಿನ್ ಅಂಶಗಳು ಸಿಗುವುದರಿಂದ ಜೊತೆಗೆ ಉತ್ತಮ ಪ್ರಮಾಣದಲ್ಲಿ ಮ್ಯಾಂಗನೀಸ್ ಕೂಡ ಲಭ್ಯವಿರುವುದರಿಂದ ಮೂಳೆಗಳ ಆರೋಗ್ಯಕ್ಕೆ ಇದು ಬಹಳ ಒಳ್ಳೆಯದು ಎಂದು ಹೇಳಲಾಗುತ್ತದೆ. ಮೂಳೆಗಳು ಮತ್ತು ಕೀಲುಗಳು ಬಲ ಗೊಳ್ಳುತ್ತವೆ ಜೊತೆಗೆ ಉರಿಯೂತ ಕೂಡ ಕಡಿಮೆಯಾಗುವುದರಿಂದ ಮೋದಕ ಹೆಚ್ಚಿನ ಆರೋಗ್ಯ ಗುಣ ಹೊಂದಿರುವ ಸಿಹಿ ಪದಾರ್ಥ ಎಂದು ಹೇಳಬಹುದು.
ರೋಗನಿರೋಧಕ ಶಕ್ತಿ ಹೆಚ್ಚಿಸುತ್ತದೆ:
ಮೋದಕದಲ್ಲಿ ಬಳಕೆಯಾಗುವ ಬೆಲ್ಲ ಕೇವಲ ಸಿಹಿ ಅಂಶವನ್ನು ನೀಡುವುದು ಮಾತ್ರವಲ್ಲದೆ ನಮ್ಮ ದೇಹಕ್ಕೆ ಕಬ್ಬಿಣದ ಪ್ರಮಾಣವನ್ನು ಮತ್ತು ಇನ್ನಿತರ ಪೌಷ್ಟಿಕ ಸತ್ವಗಳನ್ನು ನೀಡುತ್ತದೆ. ಇದು ನಮ್ಮ ಹಿಮೋಗ್ಲೋಬಿನ್ ಸಹಜ ಪ್ರಮಾಣದಲ್ಲಿರುವಂತೆ ನೋಡಿಕೊಳ್ಳುತ್ತದೆ. ಹೀಗಾಗಿ ನಮ್ಮ ರೋಗ ನಿರೋಧಕ ಶಕ್ತಿ ಸಹಜವಾಗಿ ಹೆಚ್ಚಾಗುತ್ತದೆ.
