ಮಂಗಳೂರು:(ಸೆ.27) ಸೋನಿ ಟಿವಿಯಲ್ಲಿ ಪ್ರಸಾರಗೊಳ್ಳುವ ಕೌನ್‌ ಬನೇಗಾ ಕರೋಡ್‌ಪತಿ (ಕೆಬಿಸಿ) ರಸಪ್ರಶ್ನೆ ಸ್ಪರ್ಧೆಯಲ್ಲಿ ಭಾಗವಹಿಸುವುದು ಪ್ರತಿಯೊಬ್ಬರ ಕನಸಾಗಿರುತ್ತದೆ.
ಇದನ್ನೂ ಓದಿ: ⛔ಮಂಗಳೂರು: ಬಸವರಾಜ ಕೊಲೆ ಪ್ರಕರಣ – ಆರೋಪಿ ಧರ್ಮರಾಜ್ ಬಂಧನ..!
ಬಾಲಿವುಡ್‌ ನಟ ಅಮಿತಾಭ್‌ ಬಚ್ಚನ್‌ರಿಂದ ನಿರೂಪಣೆಗೊಳ್ಳುವ ಈ ಟಿವಿ ರಿಯಾಲಿಟಿ ಶೋ ಹಲವಾರು ವರ್ಷಗಳಿಂದ ದೊಡ್ಡ ಮಟ್ಟದ ವೀಕ್ಷಕರನ್ನು ಹೊಂದಿದೆ. ಅದರಂತೆ ಈ ಸ್ಪರ್ಧೆಯಲ್ಲಿ ಭಾಗವಹಿಸುವ ಕನಸು ಹೊತ್ತು ಕಳೆದ ಎರಡು ವರ್ಷಗಳಿಂದ ಸತತ ಪ್ರಯತ್ನ ನಡೆಸುತ್ತಿದ್ದ ಮಂಗಳೂರಿನ ಪಂಪ್ವೆಲ್‌ ನಿವಾಸಿ ಅಪೂರ್ವ ಶೆಟ್ಟಿ ಇದೀಗ ತಮ್ಮ ಕನಸಿನ ಪ್ರಯತ್ನದಲ್ಲಿ ಯಶಸ್ವಿಯಾಗಿದ್ದಾರೆ.
ಪ್ರತಿಷ್ಠಿತ ಶೋನಲ್ಲಿ ಭಾಗವಹಿಸಿ 11 ಪ್ರಶ್ನೆಗಳಿಗೆ ಸರಿ ಉತ್ತರ ನೀಡಿರುವ ಅಪೂರ್ವ ಶೆಟ್ಟಿಯವರ ಈ ಎಪಿಸೋಡ್‌ ಸೆ.27ರ ರಾತ್ರಿ ಸೋನಿ ಟಿವಿಯಲ್ಲಿ ಪ್ರದರ್ಶನಗೊಳ್ಳಲಿದೆ.
ಕೌನ್‌ ಬನೇಗಾ ಕರೋಡ್‌ಪತಿ ರಸಪ್ರಶ್ನೆ ಸ್ಪರ್ಧೆಯಲ್ಲಿ ಭಾಗವಹಿಸುವುದಕ್ಕಾಗಿ ಎರಡು ವರ್ಷಗಳಿಂದ ನಿರಂತರ ಪ್ರಯತ್ನ ನಡೆಸುತ್ತಿದ್ದೆ. ಕಳೆದ ವರ್ಷ 0.03 ಸೆಕೆಂಡ್‌ ಅಂತರದಿಂದ ಹಾಟ್‌ ಸೀಟ್‌ ತಪ್ಪಿತ್ತು. ಈ ವರ್ಷ ಅವಕಾಶ ಸಿಕ್ಕಿದ್ದು, ಈ ಮೂಲಕ ನನ್ನ ಹಾಗೂ ತಂದೆಯ ಕನಸು ನನಸಾಗಿದೆ ಎಂದು ಅಪೂರ್ವ ಶೆಟ್ಟಿ ತಮ್ಮ ಖುಷಿ ಹಂಚಿಕೊಂಡಿದ್ದಾರೆ.
ಕೆಬಿಸಿ ಅನುಭವ ರೋಮಾಂಚನ ಉಂಟು ಮಾಡಿದೆ ಎಂದು ಅವರು ಹೇಳಿದ್ದಾರೆ. ತಂದೆ ಲೋಕನಾಥ ಶೆಟ್ಟಿ, ಸಹೋದರಿ ಅನನ್ಯ ಶೆಟ್ಟಿ ಈ ವೇಳೆ ಉಪಸ್ಥಿತರಿದ್ದರು. ಈ ಶೋನಲ್ಲಿ ಅಪೂರ್ವ ಶೆಟ್ಟಿ ಎಷ್ಟು ಗೆದ್ದರು? ಗೆದ್ದಿಲ್ಲವಾ? ತಿಳಿಯಲು ಇಂದಿನ ಎಪಿಸೋಡ್‌ ವೀಕ್ಷಿಸಿದ ಬಳಿಕವಷ್ಟೇ ತಿಳಿದುಬರಲಿದೆ.
ಇಂದು ರಾತ್ರಿ 9 ಗಂಟೆಗೆ ಸೋನಿ ಟಿವಿಯಲ್ಲಿ ಈ ಎಪಿಸೋಡ್‌ ಪ್ರಸಾರವಾಗಲಿದೆ. ಬಿಕಾಂ ಪದವೀಧರೆಯಾಗಿರುವ ಅಪೂರ್ವ ಶೆಟ್ಟಿ ಯುಪಿಎಸ್‌ಸಿ ಪರೀಕ್ಷೆಗೆ ಸಿದ್ಧತೆ ನಡೆಸುತ್ತಿದ್ದಾರೆ.
