Mysore Dasara 2024: (ಅ.12) ಭಾರತದಲ್ಲಿ ಮೈಸೂರು ನಗರ ತನ್ನ 10-ದಿನಗಳ ಅವಧಿಯ ದಸರಾ ಹಬ್ಬಕ್ಕೆ ಹೆಸರುವಾಸಿಯಾಗಿದೆ. ಈ ಸಮಯದಲ್ಲಿ ಇಡೀ ನಗರ ಬಣ್ಣ ಬಣ್ಣದ ವಿದ್ಯುತ್ ದೀಪಗಳಿಂದ, ಕಣ್ಮನ ಸೆಳೆಯುವ ಅಲಂಕಾರದಿಂದ ಕಂಗೊಳಿಸುತ್ತಿರುತ್ತದೆ. ‘ನಾಡ ಹಬ್ಬ’ ಎಂದು ಕರೆಯಲ್ಪಡುವ ‘ಮೈಸೂರು ದಸರಾ’ವನ್ನು ವಾರ್ಷಿಕವಾಗಿ ಹಿಂದೂ ಕ್ಯಾಲೆಂಡರ್ ತಿಂಗಳ ಅಶ್ವಿನಿ ಮಾಸದಲ್ಲಿ ಆಚರಿಸಲಾಗುತ್ತದೆ. ಇದು ಸಾಮಾನ್ಯವಾಗಿ ಗ್ರೆಗೋರಿಯನ್ ಕ್ಯಾಲೆಂಡರ್‌ನ ಸೆಪ್ಟೆಂಬರ್ ಮತ್ತು ಅಕ್ಟೋಬರ್ ತಿಂಗಳ ನಡುವೆ ಬರುತ್ತದೆ.
ದಸರಾ ಹಬ್ಬ ನವರಾತ್ರಿಯ ಆರಂಭದೊಂದಿಗೆ, ದುರ್ಗಾ ದೇವಿಯನ್ನು ಪೂಜಿಸುವ ಪವಿತ್ರ 9 ರಾತ್ರಿಗಳೊಂದಿಗೆ ಪ್ರಾರಂಭವಾಗಿ ನವರಾತ್ರಿಯ 10ನೇ ದಿನದಂದು ಕೊನೆಗೊಳ್ಳುತ್ತದೆ. ಇದನ್ನು ವಿಜಯದಶಮಿ ಎಂದು ಕರೆಯಲಾಗುತ್ತದೆ. ಇದು ಕೆಟ್ಟದ್ದರ ಮೇಲೆ ಒಳ್ಳೆಯದರ ವಿಜಯದ ದಿನವಾಗಿ ಆಚರಿಸಲಾಗುತ್ತದೆ.
ದಸರಾ ಹಬ್ಬದ ಮಹತ್ವವೇನು.?
ದುರ್ಗಾ ದೇವಿಯನ್ನು ಮತ್ತು ರಾಮನನ್ನು ಸ್ಮರಿಸುವ ಪ್ರಮುಖ ಹಬ್ಬವೇ ಈ ವಿಜಯದಶಮಿ ಅಥವಾ ದಸರಾ. ಹಿಂದೂ ಮಹಾಕಾವ್ಯದ ಪ್ರಕಾರ, ಅಯೋಧ್ಯೆಯ ರಾಜಕುಮಾರ ಭಗವಾನ್ ರಾಮನು ತನ್ನ ಪತ್ನಿ ಸೀತೆಯನ್ನು ರಾವಣನಿಂದ ರಕ್ಷಿಸಿದ ದಿನ ಇದಾಗಿದೆ. ಈ ದಿನ, ಭಗವಾನ್ ರಾಮನು ರಾಕ್ಷಸ ರಾಜನನ್ನು ಕೊಂದನು ಮತ್ತು ಅದು ಕೆಟ್ಟದ್ದರ ಮೇಲೆ ಒಳ್ಳೆಯದರ ವಿಜಯದ ಸಂಕೇತವಾಯಿತು. ಇದಲ್ಲದೆ, ವಿಜಯದಶಮಿಯು ದುರ್ಗಾ ದೇವಿಯು ರಾಕ್ಷಸ ರಾಜ ಮಹಿಷಾಸುರನನ್ನು ಸೋಲಿಸಿ ವಿಜಯಶಾಲಿಯಾದ ದಿನವನ್ನು ಸಹ ಗುರುತಿಸುತ್ತದೆ. ಇದು ನವರಾತ್ರಿ ಉತ್ಸವದ ಕೇಂದ್ರವಾಗಿದೆ ಹಾಗೂ ಸತ್ಯ ಮತ್ತು ಸದಾಚಾರದ ವಿಜಯವನ್ನು ಪ್ರತಿನಿಧಿಸುವ ದಸರಾದೊಂದಿಗೆ ಮುಕ್ತಾಯಗೊಳ್ಳುತ್ತದೆ.
ಮೈಸೂರು ದಸರಾದ ಇತಿಹಾಸ:
ಮೈಸೂರು ದಸರಾ ಉತ್ಸವಗಳು 14ನೇ ಶತಮಾನದಲ್ಲಿ ವಿಜಯನಗರ ಸಾಮ್ರಾಜ್ಯದ ಅವಧಿಯಲ್ಲಿ ಪ್ರಾರಂಭವಾಯಿತು. ಇದನ್ನು ಕರ್ನಾಟಕ ಸಾಮ್ರಾಜ್ಯ ಎಂದೂ ಕರೆಯುತ್ತಾರೆ. ಮೂಲತಃ ನವರಾತ್ರಿಯ ಆಚರಣೆಯನ್ನು ಗುರುತಿಸಲು ಮಹಾನವಮಿ ಎಂದು ಕರೆಯಲಾಗುತ್ತಿತ್ತು. ಆದರೆ ಡೆಕ್ಕನ್ ಸುಲ್ತಾನರ ಅಡಿಯಲ್ಲಿ ವಿಜಯನಗರ ಸಾಮ್ರಾಜ್ಯದ ಪತನದೊಂದಿಗೆ, ಈ ಹಿಂದೂ ಆಚರಣೆಯು ಮುಸ್ಲಿಂ ಆಡಳಿತದ ಅಡಿಯಲ್ಲಿ ಕೊನೆಗೊಂಡವು. ನಂತರ, ಸೆಪ್ಟೆಂಬರ್ 1610ರ ಮಧ್ಯದಲ್ಲಿ, ಒಂದನೇ ರಾಜ ಒಡೆಯರ್ ಶ್ರೀರಂಗಪಟ್ಟಣದಲ್ಲಿ ಈ ಬೃಹತ್ ಉತ್ಸವದ ಆಚರಣೆಗಳನ್ನು ಪ್ರಾರಂಭಿಸಿದರು.
ದಸರಾ ಹಬ್ಬದ ಮೂಲ ಮತ್ತು ನಂಬಿಕೆ:
ಹಿಂದೂ ದಂತಕಥೆಗಳ ಪ್ರಕಾರ, ಈ ದಿನ ದುರ್ಗಾ ದೇವಿಯು ಮಹಿಷಾಸುರನನ್ನು ವಧಿಸಿದ ದಿನವನ್ನು ನೆನಪಿಸುತ್ತದೆ. ಮಹಿಷಾಸುರನು ಸರ್ವಶಕ್ತ ಅರ್ಧ-ಮಾನವ, ಅರ್ಧ ಎಮ್ಮೆಯ ರೂಪದಲ್ಲಿದ್ದ ರಾಕ್ಷಸನಾಗಿದ್ದನು. ಅಂತಿಮವಾಗಿ ವಿಜಯದಶಮಿಯಂದು ಅವಳು ತನ್ನ ತ್ರಿಶೂಲದಿಂದ ಮಹಿಷಾಸುರನನ್ನು ಸಂಹಾರ ಮಾಡುತ್ತಾಳೆ. ಅಲ್ಲಿ ಅವರ ನಡುವಿನ ಯುದ್ಧ 9 ದಿನಗಳ ಕಾಲ ನಡೆಯಿತು ಎಂದು ಹೇಳಲಾಗುತ್ತದೆ. ಇದನ್ನು ಈಗ ನವರಾತ್ರಿ ಎಂದು ಆಚರಿಸಲಾಗುತ್ತದೆ.
ದೇವಿಯ ಮಹಿಷಾಸುರ ವಧೆಯಿಂದಾಗಿ ನಗರಕ್ಕೆ ಮೈಸೂರು ಎಂಬ ಹೆಸರು ಬಂತು ಎಂದು ಹೇಳಲಾಗ್ತಿದೆ. ಈ ದಿನ ದುರ್ಗಾ ದೇವಿಯ ವಿಗ್ರಹವನ್ನು ಹೊತ್ತು ಆನೆಗಳು ಜಂಬೂ ಸವಾರಿ ಮಾಡುವುದನ್ನು ನೋಡಿ ಕಣ್ತುಂಬಿಕೊಳ್ಳಬಹುದು. ಹಾಗೆಯೇ ಕತ್ತಿ, ಆಯುಧಗಳು, ಕುದುರೆಗಳು ಮತ್ತು ಹಿಂದೂ ದೇವರು ಹಾಗೂ ದೇವತೆಗಳ ವೇಷವನ್ನು ಹಾಕಿಕೊಂಡು ಪ್ರದರ್ಶನಗಳನ್ನು ನೀಡಲಾಗುತ್ತದೆ. ಮೈಸೂರಿನ ರಾಜ ಮತ್ತು ರಾಜಮನೆತನದವರು ಸಾಂಪ್ರದಾಯಿಕವಾಗಿ ದಿನದ ಪ್ರಮುಖ ಸಮಾರಂಭಗಳ ಅಧ್ಯಕ್ಷತೆಯನ್ನು ವಹಿಸುತ್ತಾರೆ.
ಹಬ್ಬದ ಸಂದರ್ಭದಲ್ಲಿ, ಮೈಸೂರಿನ ಭವ್ಯತೆ, ಜೊತೆಗೆ ಪ್ರಮುಖ ಆಕರ್ಷಣೆಗಳಲ್ಲಿ ಒಂದಾದ ಮೈಸೂರು ಅರಮನೆಯನ್ನು ಪ್ರತಿದಿನ 1,00,000 ಬಲ್ಬ್ಗಳಿಂದ ಸಂಜೆ 7 ರಿಂದ ರಾತ್ರಿ 10:00 ರವರೆಗೆ ಬೆಳಗಿಸಲಾಗುತ್ತದೆ. ಜನರು ತಮ್ಮ ಸಂಸ್ಕೃತಿ ಮತ್ತು ನಂಬಿಕೆಗಳನ್ನು ಪ್ರದರ್ಶಿಸಲು ಇಲ್ಲಿ ಸೇರುತ್ತಾರೆ.
ದಸರಾ ಪೂಜೆ ವಿಧಾನ :
- ಮುಂಜಾನೆ ಬೇಗ ಎದ್ದು ಸ್ನಾನ ಮಾಡಿ ಶುದ್ಧರಾಗಬೇಕು.
- ಮನೆಯನ್ನು ಸ್ವಚ್ಛಗೊಳಿಸಿ ಮತ್ತು ವಿಗ್ರಹದ ಮುಂದೆ ದೀಪವನ್ನು ಬೆಳಗಿಸಿ ಭಗವಾನ್ ರಾಮನಿಗೆ ಪ್ರಾರ್ಥನೆ ಸಲ್ಲಿಸಬೇಕು
- ದೇಸಿ ತುಪ್ಪದಿಂದ ದೀಪವನ್ನು ಬೆಳಗಿಸಬೇಕು ಮತ್ತು ಸಿಹಿಯನ್ನು ಹಂಚಬೇಕು
- ಹೂವುಗಳನ್ನು ಅರ್ಪಿಸುವ ಮೂಲಕ ನೀವು ತಿಳಿದೋ ಅಥವಾ ತಿಳಿಯದೆಯೋ ಮಾಡಿದ ಎಲ್ಲಾ ಪಾಪಗಳನ್ನು ತೊಡೆದುಹಾಕಲು ಶ್ರೀರಾಮನನ್ನು ಪ್ರಾರ್ಥಿಸಬೇಕು.
- ಜನರು ತಮ್ಮ ಮನೆಯನ್ನು ಅಲಂಕರಿಸಬೇಕು. ಬಣ್ಣಗಳು ಮತ್ತು ಹೂವುಗಳಿಂದ ರಂಗೋಲಿಯನ್ನು ಹಾಕಬೇಕು.
- ಗೋಧೂಳಿ ಸಮಯದಲ್ಲಿ, 11 ಅಥವಾ 21, ಮಣ್ಣಿನ ದೀಪವನ್ನು ಬೆಳಗಿಸಿ ನಿಮ್ಮ ಮನೆಯನ್ನು ದೀಪಗಳಿಂದ ಅಲಂಕರಿಸಬೇಕು.
