ಬೆಳ್ತಂಗಡಿ: (ಮೇ.10) ಗ್ರಾಮೀಣ ಪ್ರದೇಶಗಳಲ್ಲಿ ತುರ್ತು ಆರೋಗ್ಯ ಸೇವೆಯನ್ನು ಬಲಪಡಿಸುವ ಹಾಗೂ ದಕ್ಷಿಣ ಕನ್ನಡ ಜಿಲ್ಲೆಯ ಬೆಳ್ತಂಗಡಿ ತಾಲೂಕು ಮತ್ತು ಸುತ್ತಮುತ್ತಲಿನ ಗ್ರಾಮದ ಜನರಿಗೆ ಸಕಾಲದಲ್ಲಿ ವೈದ್ಯಕೀಯ ನೆರವು ಒದಗಿಸುವ ಉದ್ದೇಶದಿಂದ ಮಂಗಳೂರಿನ ಕೆಎಂಸಿ ಆಸ್ಪತ್ರೆ ಲಾಯಿಲದ ಜ್ಯೋತಿ ಆಸ್ಪತ್ರೆಯಲ್ಲಿ 24/7 ತುರ್ತು ಸೇವಾ ಕೇಂದ್ರವನ್ನು ಆರಂಭಿಸಿದೆ. ತುರ್ತು ಸಂದರ್ಭದಲ್ಲಿ ತ್ವರಿತವಾಗಿ ವೈದ್ಯಕೀಯ ನೆರವು ಕಲ್ಪಿಸುವ ಉದ್ದೇಶದ ಮಹತ್ವದ ಮೈಲಿಗಲ್ಲು ಇದಾಗಿದೆ.
ಜ್ಯೋತಿ ಆಸ್ಪತ್ರೆಯ ಸಹಯೋಗದಲ್ಲಿ ಕೆಎಂಸಿ ಆಸ್ಪತ್ರೆಯ ನುರಿತ ತಜ್ಞರ ವೈದ್ಯಕೀಯ ಸೇವೆ ಹಾಗೂ ಆರೋಗ್ಯ ಕ್ಷೇತ್ರದ ಅಗತ್ಯ ಸಂಪನ್ಮೂಲಗಳನ್ನು ನೇರವಾಗಿ ಲೈಲಾ ಮತ್ತು ಸುತ್ತಮುತ್ತಲಿನ ಜನರಿಗೆ ತಲುಪಿಸಲು ಸಾಧ್ಯವಾಗಿದೆ. ಪಾರ್ಶ್ವವಾಯು, ಹೃದಯಾಘಾತ, ಮರದಿಂದ ಬಿದ್ದು ಅಪಘಾತ, ಹಾವು ಕಡಿತ, ಮಕ್ಕಳ ತುರ್ತು ಚಿಕಿತ್ಸೆಯಂತಹ ಸಂದರ್ಭದಲ್ಲಿ ಜೀವರಕ್ಷಣೆಗೆ ನಿರ್ಣಾಯಕ ಎನಿಸುವಂತಹ ‘ಗೋಲ್ಡನ್‌ಅವರ್‍’ ಸಮಯದಲ್ಲಿ ತ್ವರಿತವಾಗಿ ವೈದ್ಯಕೀಯ ನೆರವು ನೀಡಲು ಈ 24/7 ತುರ್ತು ಸೇವೆ ಸೌಲಭ್ಯವನ್ನು ರೂಪಿಸಲಾಗಿದೆ.
“ಜ್ಯೋತಿ ಆಸ್ಪತ್ರೆಯೊಂದಿಗಿನ ನಮ್ಮ ಪಾಲುದಾರಿಕೆಯು ನಗರ ಕೇಂದ್ರಗಳನ್ನು ಮೀರಿ ಸುಧಾರಿತ ತುರ್ತು ಆರೈಕೆ ಒದಗಿಸುವಂತೆ ಮಾಡುವ ಕೆಎಂಸಿಯ ಅಚಲ ಬದ್ಧತೆಗೆ ಉದಾಹರಣೆಯಾಗಿದೆ. ಗ್ರಾಮೀಣ ಭಾರತದಲ್ಲಿ ತುರ್ತು ಆರೈಕೆ ಎಂಬುದು ಗಗನಕುಸುಮ. ಅಸಮರ್ಪಕ ಸಾರಿಗೆ ವ್ಯವಸ್ಥೆಯ ಕಾರಣ ಹಲವು ಬಾರಿ ರೋಗಿಗೆ ತುರ್ತು ವೈದ್ಯಕೀಯ ನೆರವು ನೀಡುವಲ್ಲಿ ತೊಡಕಾಗುತ್ತದೆ. ಆದರೆ ಆಸ್ಪತ್ರೆ ಜೊತೆಗಿನ ಈ ಪಾಲುದಾರಿಕೆ ಈ ಸಮಸ್ಯೆಯನ್ನು ತಗ್ಗಿಸಿ ಮನೆ ಬಾಿಗಿಲಿಗೆ ವೈದ್ಯಕೀಯ ನೆರವು ನೀಡುವ ಉದ್ದೇಶ ಹೊಂದಿದೆ. ಆಂಬ್ಯುಲೆನ್ಸ್ ಸೇವೆಗಾಗಿ ನಮ್ಮ 24/7 ತುರ್ತು ಸಂಖ್ಯೆ 8050416333ಗೆ ನಾಗರಿಕರು ಕರೆ ಮಾಡಬಹುದಾಗಿದ್ದು , ಬೆಳ್ತಂಗಡಿಯ ಯುವಕರು ಮತ್ತು ಜನರಿಗೆ ಪ್ರಥಮ ಚಿಕಿತ್ಸಾ ಕುರಿತು ತರಬೇತಿಯನ್ನು ಕೂಡ ನೀಡುತ್ತೇವೆ” ಎಂದು ಡಾ. ಬಿ.ಆರ್. ಅಂಬೇಡ್ಕರ್ ವೃತ್ತದಲ್ಲಿರುವ ಮಂಗಳೂರಿನ ಕೆಎಂಸಿ ಆಸ್ಪತ್ರೆಯ ಎಮರ್ಜೆನ್ಸಿ ಮೆಡಿಸಿನ್ ವಿಭಾಗದ ಮುಖ್ಯಸ್ಥ ಡಾ ಜೀಧು ರಾಧಾಕೃಷ್ಣ ಹೇಳಿದರು.
ಜ್ಯೋತಿ ಆಸ್ಪತ್ರೆಯ ಆಡಳಿತಾಧಿಕಾರಿ ಸಿಸ್ಟರ್ ಮೆರಿಟ್ ಎಸ್.ಡಿ. ಮಾತನಾಡಿ, “ಇದು ವೈದ್ಯಕೀಯ ನೆರವು ಅಗತ್ಯವಿರುವವರೆಡೆಗಿನ ನಂಬಿಕೆ ಮತ್ತು ಅಚಲ ಬದ್ಧತೆಯ ಸೇವೆಯಾಗಿದೆ. ಜ್ಯೋತಿ ಆಸ್ಪತ್ರೆ ವಿಚಾರದಲ್ಲಿ ಹೇಳುವು ದಾದರೆ ಸೇವಾ ಸ್ಥಳ ಎಷ್ಟೇ ದೂರದಲ್ಲಿದ್ದರೂ ಅಥವಾ ಸಂಪನ್ಮೂಲಗಳು ಎಷ್ಟೇ ಸೀಮಿತವಾಗಿದ್ದರೂ, ಪ್ರತಿಯೊಂದು ಜೀವವೂ ಮುಖ್ಯ ಎಂದು ನಾವು ಯಾವಾಗಲೂ ನಂಬಿದ್ದೇವೆ. ತುರ್ತು ಆರೈಕೆಯಲ್ಲಿನ ಈ ಹೊಸ ಹೆಜ್ಜೆಯು, ನಮ್ಮ ಸಮುದಾಯದವರ ಜೊತೆಗೆ ಕೇವಲ ಅಗತ್ಯವಿರುವಾಗ ಮಾತ್ರವಲ್ಲದೇ ಸದಾ ಜೊತೆಗಿರುವ ಭರವಸೆಯಾಗಿದೆ” ಎಂದು ಹೇಳಿದರು.
ಜ್ಯೋತಿ ಆಸ್ಪತ್ರೆ ಪ್ರಸೂತಿ ಮತ್ತು ಸ್ತ್ರೀರೋಗ ಶಾಸ್ತ್ರ, ಜನರಲ್ ಮೆಡಿಸಿನ್ ಮತ್ತು ಸರ್ಜರಿ, ಪಿಡಿಯಾಟ್ರಿಕ್‌, ಆರ್ಥೋಪೆಡಿಕ್ಸ್, ನೆಫ್ರಾಲಜಿ, ಯೂರೋಲಾಜಿ, ಇಎನ್‌ಟಿ, ಕಾರ್ಡಿಯಾಲಜಿ, ಐಸಿಯು, ಅರಿವಳಿಕೆಶಾಸ್ತ್ರ, ಫಿಸಿಯೋಥೆರಪಿ, ಡೇ ಕೇರ್, ಒಳರೋಗಿ ಮತ್ತು ಹೊರರೋಗಿ ಸೇವೆಗಳು, ಕ್ಲಿನಿಕಲ್ ಲ್ಯಾಬ್, ರೇಡಿಯಾಲಜಿ (ಎಕ್ಸ್-ರೇ, ಅಲ್ಟ್ರಾಸೌಂಡ್, ಇಸಿಜಿ), ಡಿಜಿಟಲ್ ಮೆಡಿಕಲ್ ರೆಕಾರ್ಡ್ಸ್ ವಿಭಾಗ, ಫಾರ್ಮಸಿ ಮತ್ತು ಬಯೋಮೆಡಿಕಲ್ ತ್ಯಾಜ್ಯ ನಿರ್ವಹಣಾ ವ್ಯವಸ್ಥೆಗಳು ಸೇರಿದಂತೆ ವಿವಿಧ ಸೌಲಭ್ಯಗಳನ್ನು ಒದಗಿಸುತ್ತಿದೆ.
“ಕೆಎಂಸಿ ಆಸ್ಪತ್ರೆಯಲ್ಲಿ ನಾವು ಉತ್ತಮ ಗುಣಮಟ್ಟದ ಆರೋಗ್ಯ ಸೇವೆಯು ಯಾವುದೋ ಒಂದು ಪ್ರದೇಶಕ್ಕೆ ಮಾತ್ರ ಸೀಮಿತವಾಗಬಾರದು ಎಂದು ನಂಬುತ್ತೇವೆ. ನಮ್ಮ ಕಾರ್ಯಾಚರಣಾ ವ್ಯವಸ್ಥೆಗಳನ್ನು ಸರಾಗವಾಗಿ ಸಂಯೋಜಿಸುವ ಮೂಲಕ ಮತ್ತು ನಮ್ಮ ಕ್ಲಿನಿಕಲ್ ಪರಿಣತಿಯನ್ನು ಬಳಸಿಕೊಳ್ಳುವ ಮೂಲಕ, ಯಾವುದೇ ರೋಗಿಯು, ಅವರ ಸ್ಥಳ ಏನೇ ಇರಲಿ, ಸಕಾಲಿಕ ಮತ್ತು ಸೂಕ್ತ ಆರೈಕೆ ಪಡೆದೇ ಪಡೆಯುತ್ತಾನೆ ಎಂಬ ದೃಢ ನಂಬಿಕೆ ಉಳಿಸಿಕೊಳ್ಳುವಂಥಹ ಕಾರ್ಯಪಡೆಯನ್ನು ನಾವು ನಿರ್ಮಿಸುತ್ತಿದ್ದೇವೆ. ಇಂತಹ ಮಾದರಿ ಸಹಯೋಗ ನೀಡುವ ನಗರ ಆರೋಗ್ಯ ಸಂಸ್ಥೆಗಳು, ಗ್ರಾಮೀಣ ಆರೋಗ್ಯ ಮೂಲಸೌಕರ್ಯವನ್ನು ಹೇಗೆ ಪರಿಣಾಮಕಾರಿಯಾಗಿ ಸಬಲೀಕರಣಗೊಳಿಸಬಹುದು ಮತ್ತು ಗಮನಾರ್ಹವಾಗಿ ಉನ್ನತೀಕರಿಸಬಹುದು ಎಂಬುದಕ್ಕೆ ಪ್ರಬಲ ಉದಾಹರಣೆಯಾಗಿದೆ” ಎಂದು ಕೆಎಂಸಿ ಆಸ್ಪತ್ರೆಯ ಪ್ರಾದೇಶಿಕ ಮುಖ್ಯ ಕಾರ್ಯ ನಿರ್ವಾಹಕ ಅಧಿಕಾರಿ ಸಘೀರ್ ಸಿದ್ಧಿಕಿ ಹೇಳಿದರು.
24/7 ಕಾಲ ವೈದ್ಯಕೀಯ ಸೇನೆಗೆ ಸಿದ್ಧವಾಗಿರುವ ತುರ್ತು ವೈದ್ಯಕೀಯ ತಜ್ಞರ ಲಭ್ಯತೆ ಭರವಸೆಯೊಂದಿಗೆ, ಲೈಲಾದ ಜ್ಯೋತಿ ಆಸ್ಪತ್ರೆಯು ತೀವ್ರ ಆಘಾತ, ತೀವ್ರ ಹೃದಯ ಸಂಬಂಧಿ ಘಟನೆಗಳು ಮತ್ತು ನರ ವೈಜ್ಞಾನಿಕ ಬಿಕ್ಕಟ್ಟುಗಳು ಸೇರಿದಂತೆ ಸಂಕೀರ್ಣ ಮತ್ತು ನಿರ್ಣಾಯಕ ತುರ್ತು ಪರಿಸ್ಥಿತಿಗಳನ್ನು ಪರಿಣಾಮಕಾರಿಯಾಗಿ ನಿರ್ವಹಿಸುವ ಸಾಮರ್ಥ್ಯವನ್ನು ಜ್ಯೋತಿ ಆಸ್ಪತ್ರೆ ಹೊಂದಿದೆ.
ಗ್ರಾಮೀಣ ಜನಸಂಖ್ಯೆಗೆ ಹೆಚ್ಚು ಅಗತ್ಯವಿರುವಾಗ ನಿಖರವಾಗಿ ಸಕಾಲಿಕ, ನುರಿತ ವೈದ್ಯಕೀಯ ಆರೈಕೆಯನ್ನು ತಲುಪಿಸುವುದು ಎರಡೂ ಆಸ್ಪತ್ರೆಗಳ ಪ್ರಮುಖ ಉದ್ದೇಶವಾಗಿದೆ. ವೈದ್ಯಕೀಯ ಅಧೀಕ್ಷಕ ಡಾ. ಸೀನಿಯರ್ ಆನ್ ಗ್ರೇಸ್ ಅವರು ಕಾರ್ಯಕ್ರಮಕ್ಕೆ ಆಗಮಿಸಿದ ಅತಿಥಿಗಳನ್ನು ಸ್ವಾಗತಿಸಿದರು.
