Kadaba:(ನ.5) ಕೋಡಿಂಬಾಳ ಸಮೀಪದ ಪುಳಿಕುಕ್ಕು ಬಳಿ ಮರ ಬಿದ್ದು ವ್ಯಕ್ತಿ ಸಾವು ಪ್ರಕರಣಕ್ಕೆ ಸಂಬಂಧಪಟ್ಟಂತೆ ವಿಚಿತ್ರ ಘಟನೆಯೊಂದು ನಡೆದಿದೆ.
ಇದನ್ನೂ ಓದಿ: ⭕ಅಜೆಕಾರು: ಉಡುಪಿ ಜಿಲ್ಲೆಯನ್ನೇ ಬೆಚ್ಚಿ ಬೀಳಿಸಿದ ಬಾಲಕೃಷ್ಣ ಪೂಜಾರಿ ಹತ್ಯೆ ಪ್ರಕರಣ
ಮೃತ ಸೀತಾರಾಮ ಗೌಡ ಅವರು ಸ್ಕೂಟಿಯಲ್ಲಿ ಕೊಂಡೊಯ್ಯುತ್ತಿದ್ದ ಕೋಳಿ ಮಾತ್ರ ಸಾವು ನಡೆದು ಎರಡು ದಿನ ಕಳೆದರೂ ಸ್ಥಳ ಬಿಟ್ಟು ಕದಲದೇ ಅಲ್ಲೇ ಇರುವುದು ಆಶ್ಚರ್ಯಕ್ಕೆ ಕಾರಣವಾಗಿದೆ.
ದೀಪಾವಳಿ ಪ್ರಯುಕ್ತ ಎಡಮಂಗಲದ ತನ್ನ ಮನೆಯಲ್ಲಿ ನಡೆಯಲಿದ್ದ ದೈವದ ಹರಕೆಗೆಂದು ಕೋಡಿಂಬಾಳದಿಂದ ಕೋಳಿ ತೆಗೆದುಕೊಂಡು ಸ್ಕೂಟಿಯಲ್ಲಿ ಸೀತಾರಾಮ ಅವರು
ಎಡಮಂಗಲದತ್ತ ಹೋಗುತ್ತಿದ್ದ ಸಂದರ್ಭದಲ್ಲಿ, ರಸ್ತೆ ಪಕ್ಕ ಇದ್ದ ದೂಪದ ಮರ ತಲೆಗೆ ಬಿದ್ದು ಗಂಭೀರ ಗಾಯಗೊಂಡು ಮೃತಪಟ್ಟಿದ್ದರು. ಈ ಘಟನೆ ನ.2 ರಂದು ನಡೆದಿದೆ.
ಸ್ಕೂಟಿಯಲ್ಲಿ ಕೋಳಿಯ ಕಾಲನ್ನು ಹಗ್ಗದಿಂದ ಕಟ್ಟಿದ್ದರಿಂದ ಅದು ಮೃತದೇಹದ ಬಳಿಯೇ ಇತ್ತು. ನಂತರ ಸ್ಥಳದಲ್ಲಿದ್ದವರು ಬಂದು ಕೋಳಿಯ ಕಾಲಿಗೆ ಕಟ್ಟಲಾಗಿದ್ದ ಹಗ್ಗವನ್ನು ಬಿಚ್ಚಿ ಬಿಟ್ಟಿದ್ದರು.
ನಂತರ ಕೋಳಿ ಹತ್ತಿರ ಇರುವ ಕಾಡಿನೊಳಗೆ ಹೋಗಿತ್ತು. ನಂತರ ಜನರೆಲ್ಲ ಹೋದ ನಂತರ ಮತ್ತೆ ಸ್ಕೂಟಿ ಬಳಿ ಬಂದು ಕುಳಿತು ಬಿಟ್ಟಿದೆ. ಜನರು ಹತ್ತಿರ ಬಂದಾಗ ಪಕ್ಕದ ಮರದ ರೆಂಬೆಯ ಮೇಲೆ ಆಶ್ರಯ ಪಡೆಯುತ್ತಿದ್ದ ಕೋಳಿ ಕಳೆದ ಎರಡು ದಿನದಿಂದ ಆ ದುರ್ಘಟನೆ ನಡೆದ ಸ್ಥಳದಿಂದ ಕದಲದೇ ಇರುವುದು ನೋಡಿ ನಿಜಕ್ಕೂ ಜನರು ಆಶ್ಚರ್ಯ ಪಟ್ಟಿದ್ದಾರೆ.
