ಬೆಂಗಳೂರು: ಜೈ ತುಲುನಾಡ್ ಬೆಂಗಳೂರು (ರಿ.) ಸಂಘಟನೆದ ಮುತಾಲಿಕೆಡ್ ಉಂದುವೇ ಬರ್ಪಿನ ತೇದಿ 9 ಅಗಸ್ಟ್ 2026 ನೇ ಐತಾರದಾನಿ ರಾಜಬೂಡುದ ಮುಲ್ಕಿ ಸುಂದರ್ ರಾಮ್ ಶೆಟ್ಟಿ ಸಭಾಂಗಣೊಡ್ “ತುಲುನಾಡ ಆಟಿ_2026” ಪನ್ಪಿನ ತುಲುನಾಡ್ದ ಆಟಿದ ತಿಂಗೊಲ್ದ ನೆಂಪು ಮಲ್ಪುನ ಮಲ್ಲ ಮಟ್ಟ್ ದ ಲೇಸ್ ನಡಪರೆ ಉಂಡು.
ಆನಿದ ದಿನ ಕಾಂಡೆ 7:15 ಗ್ ಬಿಳೇಕಹಳ್ಳಿದ ಅಯ್ಯಪ್ಪ ಸ್ವಾಮಿನ ನಡೆಟ್ ಕೈ ಮುಗಿ ಬೊಕ್ಕ ಅಲ್ತ್ ರ್ದ್ ಎಂ.ಎಸ್.ಆರ್.ಎಸ್. ಸಂಭಾಗಣ ಮುಟ್ಟ “ತುಳು ದಿಬ್ಬಣ” ನಡಪರೆ ಉಂಡು. 8:15 ಗಂಟೆಗ್ ಲೇಸ್ ಉದಿಪನ ಬೊಕ್ಕ ಚಾವಡಿ ಲೇಸ್ ನಡಪುಂಡು. 8:45 ಗಂಟೆಗ್ ಮಿತ್ತರ್ಮೆಡ್ ಬಿನ್ನೆರೆನ ಉಪಸ್ಥಿತಿಡ್ ಕುಣಿತ ಭಜನೆ ನಡಪರೆ ಉಂಡು.
ಕಾಂಡೆ 10:00 ಗಂಟೆರ್ದ್ ಬಯ್ಯ 4:30 ಗಂಟೆ ಮುಟ್ಟ ಭರತನಾಟ್ಯ, ತುಳು ಜಾನಪದ ನಲಿಕೆ, ಪದರಂಗಿತ, ಆಟಿ ಕಳೆಂಜ, ಚೆಂಡೆ ನಲಿಕೆ ಉಂದು ಮಾತ ಸಾಂಸ್ಕೃತಿಕ ಲೇಸ್ ನಡಪರೆ ಉಂಡು ಅಂಚೆನೆ ‘ಯಶಸ್ವಿ ಡ್ಯಾನ್ಸ್ ಗ್ರೂಪ್’ ಕುಡ್ಲ ಮೊಕ್ಲೆನ ತುಳು ಜಾನಪದ ನಲಿಕೆ ವಿಸೇಸ ಆಕರ್ಷಣೆ ಆದುಪ್ಪುಂಡು.
ಬತ್ತಿ ಬಿನ್ನೆರೆರ್ದ್ "ತುಳು ರಾಜ್ಯ ಬಾಸೆ ಓಡೆಗ್ ಎತ್ತ್ಂಡ್?" ಪನ್ಪಿನೈತ ಬಗೆಟ್ ವಿಚಾರ ಸಂಕಿರಣೊ ಬೊಕ್ಕ ಆಟಿದ ಮಹತ್ವ ಪನ್ಪಿನ "ಆಟಿದ ಪೊಲಬು" ವಿಷಯೊದ ಬಗ್ಗೆ ಉಪನ್ಯಾಸ ನಡಪೆರೆ ಉಂಡು.
ಕಾಂಡೆ 11:00 ಗಂಟೆಗ್ ಯಕ್ಷ ತರಂಗ ಬೆಂಗಳೂರು (ರಿ.) ಮುಕುಲೆನ ಕಡೆರ್ದ್ “ಕೋಟಿ-ಚೆನ್ನಯ” ಜೋಕುಲೆನ ಯಕ್ಷಗಾನ(ಆಟ) ಪ್ರಸಂಗ ನಡಪುಂಡು.
ಇಡಿ ದಿನ ಜೋಕುಲೆಗ್, ಪೋಂಜೊವುಲೆಗ್ , ಆಂಜೊವುಲೆಗ್ ಗೊಬ್ಬುಲು ಉಂಡು. ಮದಿಮೆ ಆತಿನ ಜೋಡಿಲೆಗಾದ್ “ಜೋಡಿ ಪಕ್ಕಿಲು” ಪನ್ಪಿನ ಗೊಬ್ಬು ನಡಪರೆ ಉಂಡು. ಅಯಿತ್ತ ಒಟ್ಟುಗೆ ಆಣ್_ಪೊಣ್ಣುಲೆಗ್ “ಬಲ್ಲ್ ಬುಡಯೆ” ಪನ್ಪಿನ ಬಲ್ಲ್ ಒಯ್ಪುನ ಪಂತ ನಡಪೆರೆ ಉಂಡು.
ಮದ್ಯಾನ ಆಟಿದ ವಿಸೇಸ ಒಣಸ್ ದ ವ್ಯವಸ್ಥೆಲಾ ಉಂಡು.
ಬಯ್ಯ 4:30 ಗಂಟೆಗ್ ಅಜತ್ತಿ ಸಾಧಕೆರೆಗ್ ಮಾನಾದಿಗೆ ಮಲ್ಪುನ ಲೇಸ್ ನಡಪೆರೆ ಉಂಡು. ಅಯಿತ್ತ ಒಟ್ಟುಗು ತುಲು ಲಿಪಿ ಪರೀಕ್ಷೆ ಬರೆತಿನಕುಲೆಗ್ ಆಜೋಲೆ ಪಟ್ಟುನ, ಪಂತೊಲೆಡ್ ಗೆಂದಿನಕ್ಲೆಗ್ ಇನಾಮು ಕೊರ್ಪಿನ ಕಜ್ಜೊಲ ನಡಪೆರೆ ಉಂಡು ಪಂದ್ ಕಾರ್ಯಂತೆರ್ ಅಕ್ಷಯ್ ಆಚಾರ್ಯ ಮೇರ್ ಪ್ರಕಟಣೆ ಕೊರ್ತೆರ್.
ಮಾನಾದಿಗೆದ ಸಲಹೆಗಾರೆರಾಯಿನ ನಿಧೀಶ್ ಶೆಟ್ಟಿ ಮೇರ್, ಬೆಂಗಳೂರುಡು ಉಪ್ಪುನ ಸಮಸ್ತ ತುಳುವೆರ್ ಈ ಲೇಸ್ಡ್ ಮದಪಂದೆ ಪಾಲ್ ಪಡೆಲೆ ಪಂಡೆರ್.
ಗುರ್ಕಾರ್ಲ್ ವಿನಯ್ ಮಣಿಯಾನ ಪಾತೆರ್ದ್, ಬೇಲೆ-ವ್ಯವಹಾರೊದ ನಿಟ್ಟ್ ಡ್ ಬೆಂಗಳೂರುಡು ನಿಲೆ ಆಯಿನ ತುಳುನಾಡ್ದ ಜನಕುಲು ಊರ್ದ ರುಚಿ , ಸಂಸ್ಕೃತಿ ಬೊಕ್ಕ ಆಟಿದ ವಿಸೇಸ ಅನುಭವ ಪಡೆಯೆರೆ ಉಂದು ಒಂಜಿ ಎಡ್ಡೆ ಅವಕಾಶ . ಸಮಸ್ತ ಜನಕುಲು ನೆಟ್ಟ್ ಪಾಲ್ ಪಡೆದ್ ಲೇಸ್ ನ್ ಗೆಂದಾವೊಡು ಪಂಡ್ ದ್ ಮಾತೆರ್ಡಲ ಕೇನೊಂದೆರ್.
